ಮಂಗಳೂರು ವಿಮಾನ ಅಪಘಾತದಲ್ಲಿ ಅಗಲಿದ ಚೇತನಗಳಿಗೆ ಕವನ ಕಂಬನಿ

ವಿಧಿಯಾಟದ ವಿಚಿತ್ರ
ನಿಯಮಗಳ ಅರಿವಿಲ್ಲ
ಬಡಪಾಯಿ ಮಾನವನಿಗೆ;
ಪೂರ್ವ ಕರಾವಳಿಗಷ್ಟೇ ಅಲ್ಲ
ಪಶ್ಚಿಮ ದಂಡೆಗೂ ಬಡಿದಿದೆ
ಭೀಕರ ಬಿರುಗಾಳಿಯೊಂದು.

ಬಿರುಗಾಳಿಯು ತಂದಿದ್ದ
ತುಂತುರು ಮಳೆ
ಸುಡುಮದ್ದಿನಂತೆ ಸುರಿದು
ಹೃದಯವೀಗ ಸುಡುತ್ತಿದೆ

ಆಪ್ತರ ಒಡನಾಟವೀಗ
ಬರೇ ನೆನಪುಗಳೆಂದು
ನಂಬಲು; ಮನಸು
ಹರಸಾಹಸ ಪಡುತ್ತಿದೆ

ಮನದ ಬೇಗುದಿಯನು
ಬಣ್ಣಿಸಲಿ ಹೇಗೆ....
ಬಂಧುಗಳ ಹೊತ್ತು
ಹಾರಿ ಬಂದಿದ್ದ ಹಕ್ಕಿಯೊಂದು
ಗೂಡಿಗೆ ಸೇರುವಷ್ಟರಲ್ಲಿ
ಎಡವಿ ಬಿದ್ದಿತು ಹೇಗೆ?

ಜಡಿಮಳೆಯ ರೂಪ ತಾಳಿವೆ
ತುಂತುರು ಮಳೆ ಈಗ;
ನೀರಿನ ರಭಸಕೆ
ಸುಖವೆಲ್ಲಾ ಕೊಚ್ಚಿ ಹೋಗಿದೆ
ನೆರೆ ತುಂಬಿ, ಕಾಣದ ದಾರಿಯಲಿ
ಮುಂದೆ ಹೋಗಲಿ ಹೇಗೆ???